ສະບາຍດີໝູ່ເພື່ອນທຸກຄົນ, ມື້ນີ້ຂ້ອຍຈະມາສະຫຼຸບກ່ຽວກັບເກັດຄວາມຮູ້ທີ່ໄດ້ຈາກການ Live ຄັ້ງທຳອິດຂອງ “ນັກການເງິນ” ໃນຫົວຂໍ້ “ເຈາະເລິກເນື້ອຫາປຶ້ມ ຄິດແບບນັກບໍລິຫານ” ເຊິ່ງໄດ້ກຳນົດໃຫ້ Live ດຳເນີນໄປປະມານ 30 ນາທີ

ໂດຍຂ້ອຍເຫັນວ່າ...ມີເນື້ອຫາສາລະດີ ທີ່ຂ້ອຍຄວນຈະຈັບຍົກເອົາບາງປະເດັນຂອງ ອ້າຍເອກກະສິດ Live ເປັນຄັ້ງທຳອິດ ອອກມາແຊຣ໌ ຫຼື ແບ່ງປັນ ໃຫ້ໝູ່ເພື່ອນ ຜ່ານມຸມມອງຂອງຂ້ອຍເອງທີ່ມີຕໍ່ Live ນີ້!

ວີດີໂອໜຶ່ງໆ ມັກມີສ່ວນເກີນ ຫຼື ສ່ວນຍ່ອຍບໍ່ຫຼາຍກໍໜ້ອຍ...ທີ່ມັກເວົ້າເອົາແມ່ນ້ຳທັງ 5 ມາໂຊໃຫ້ເກີດຄວາມໜ້າເບື່ອ, ແຕ່ຂ້ອຍຈະຈັບເອົາພຽງແກ່ນສານຂອງເລື່ອງໃນລະດູການນີ້ ມາສະຫຼຸບເປັນບົດຄວາມສັ້ນໆໃຫ້ໄດ້ອ່ານກັນ...

ປຶ້ມ "ຄິດແບບນັກບໍລິຫານ" ຜົນງານການຂຽນເຫຼັ້ມທີ 4, ໂດຍ: ເອກກະສິດ ສິລິຈັກ

ໂດຍທຳອິດ ກໍຈະເວົ້າກ່ຽວກັບການບໍລິຫານ ຫຼື ການເປັນນັກບໍລິຫານ ຈາກປະສົບການຂອງໂຕອ້າຍເອກເອງ...ເພາະການເຮັດທຸລະກິດຂອງລາວ ແມ່ນມີຄວາມຮູ້ມາຈາກການອ່ານເປັນສ່ວນຫຼາຍ ຊຶ່ງບໍ່ມີປະສົບການມາກ່ອນ ແລະ ກໍຄິດວ່າມັນຄົງງ່າຍຕາມທີ່ໜັງສືຂຽນໄວ້ຫັ້ນແລະ...(ບວກກັບປັດໄຈຫຼາຍຢ່າງ ຈຶ່ງເຮັດໃຫ້ທຸລະກິດທີ່ດຳເນີນມານັ້ນ ຢຸດສະງັກລົງ)

ຄວາມຈິງແລ້ວບໍ່ແມ່ນເລີຍ...ເພາະການເຮັດທຸລະກິດ ມັນຫຼຸດອອກມາຈາກໂລກນິຍາຍ ແລ້ວປະເຊີນກັບຄວາມເປັນຈິງຫຼາຍກວ່າໂຕອັກສອນທີ່ຂຽນໄວ້, ແມ່ນວ່າສິ່ງທີ່ໄດ້ອ່ານມານັ້ນ ຈະເປັນປະສົບການຂອງຜູ້ທີ່ປະສົບຜົນສຳເລັດກໍຕາມ

ຫຼື ຄວາມເຂົ້າໃຈໜຶ່ງທີ່ວ່າ...ຖ້າຫາກເຮົາມີເງິນຫຼາຍ ມາສະໜອງໃຫ້ກັບບໍລິສັດ ຈະສາມາດປະຄັບປະຄອງບໍລິສັດໄດ້ດີ ແລະ ເມື່ອເກີດບັນຫາຂອງການດຳເນີນທຸລະກິດໃນອົງກອນຂຶ້ນມາ ຈະສາມາດແກ້ໄຂໄດ້ດ້ວຍການໂຍນເງິນເຂົ້າໄປ...ມັນກໍບໍ່ແມ່ນສະເໝີໄປອີກ

ແຕ່ປະເດັນຢູ່ທີ່ “ຜູ້ນຳຂອງອົງກອນ” ຕ່າງຫາກ ເປັນປັດໄຈສຳຄັນຂອງການເຮັດທຸລະກິດ

ແລ້ວຜູ້ນຳຂອງອົງກອນທີ່ດີ ແມ່ນຫຍັງ, ຄວນມີອົງປະກອບອັນໃດແດ່?...ຂ້ອຍວ່າ ຄຳຕອບນີ້ມີຢູ່ໃນປຶ້ມ “ຄິດແບບນັກບໍລິຫານ” ນີ້ແລະ, ເຊິ່ງມີຫຼາຍໆຢ່າງມາປະກອບເຂົ້າກັນ ຈຶ່ງຈະສາມາດເປັນນັກບໍລິຫານທີ່ເກັ່ງ ແລະ ດີໄດ້ (ຕົວຢ່າງ, ບົດທີ 8: “ນິໄສຂອງຫົວໜ້າ ຄືວັດທະນະທຳຂອງອົງກອນ” ທີ່ຂ້ອຍເຄີຍເກິ່ນໄວ້ໜ້ອຍໜຶ່ງໃນບົດຄວາມກ່ອນໆ”)

"ຜູ້ນຳທີ່ເກັ່ງສາມາດເຮັດໃຫ້ດິນທີ່ແຫ້ງແລ້ງ ກາຍເປັນປ່າທີ່ອຸດົມສົມບູນ, ນັກບໍລິຫານທີ່ເກັ່ງສາມາດເຮັດໃຫ້ບໍລິສັດທີ່ໃກ້ຈະລົ້ມລະລາຍ ພິກຟື້ນກັບມາມີກຳໄລ"-ປຶ້ມ ຄິດແບບນັກບໍລິຫານ

ຕໍ່ຈາກນັ້ນ, ກໍມາທີ່ຄຳຖາມ “ໄອເດຍມາກ່ອນເງິນ ມັນແມ່ນແນວໃດ?”

ງ່າຍໆເລີຍຄື ເຮົາບໍ່ມີເງິນ (ຫຼື ເກີດມີຄວາມຂັດສົນທາງດ້ານການເງິນ), ຈຶ່ງນຳເອົາໄອເດຍທີ່ມີຢູ່ ມາສ້າງໃຫ້ມັນກາຍເປັນເມັດເງິນຂຶ້ນມາ

ເຊິ່ງອາດຈະເປັນການສະເໜີແຜນທຸລະກິດ ຫຼື ໄອເດຍຂອງຕົນໃຫ້ແກ່ນັກລົງທຶນ (ຮູບແບບທຸລະກິດ Start-up) ເພື່ອໃຫ້ໄດ້ເງິນມາດຳເນີນທຸລະກິດຂອງເຈົ້າ...

ການທີ່ມີໄອເດຍໃນການຂຽນປຶ້ມດີໆຂຶ້ນມາ, ແຕ່ບໍ່ມີເງິນທຶນໃນການພິມປຶ້ມ ກໍໄປສະເໜີໃຫ້ກັບຜູ້ທີ່ມີເງິນທຶນ (ອັນນີ້...ແນະນຳໃຫ້ໄປຫາ ອາຈານ ກາບແກ້ວ ທຳມະວົງ ທີ່ເປັນນັກເວົ້າສ້າງແຮງບັນດານໃຈ ແລະ ນັກຂຽນລາງວັນນາກຄຳ ເພິ່ນອາດມີຄຳແນະນຳດີໆໃຫ້)

ນີ້ແມ່ນການໃຊ້ໄອເດຍ ເພື່ອຫາເງິນ!

ແຕ່ໃນທາງກັບກັນ, ມັນຂ້ອນຂ້າງງ່າຍສຳລັບປະເທດທີ່ພັດທະນາແລ້ວຢ່າງສະຫະລັດອາເມຣິກາ ເຊິ່ງແຕກຕ່າງຈາກບ້ານເຮົາຢ່າງສິ້ນເຊີງ ທີ່ຍາກໃນການທີ່ຈະເຮັດແບບນີ້...ແຕ່ຂ້ອຍກັບຄິດວ່າ “ມັນຍາກຫຼາຍກວ່າ” ຖ້າຫາກເຈົ້າຍັງຄົງຢູ່ຊື່ໆ ແລ້ວປະໃຫ້ນັກລົງທຶນແລ່ນມາຫາ...

*ເລື່ອງ “ໄອເດຍສຳຄັນກວ່າເງິນ” ມັນຄືຫົວຂໍ້ທີ່ອ້າຍເອກ ເຄີຍບັນຍາຍໃນງານ “ຕະຫຼາດນັດຈັດຫາງານ ແລະ ການສຶກສາວຽງຈັນ” ຄັ້ງທີ 6 ທີ່ໂຮງແຮມດອນຈັນພາເຣດ ເມື່ອປີກາຍນີ້, ເຊິ່ງຖ້າຫາກ ທຸກຄົນຢາກໄດ້ສຽງບັນທຶກ ລອງສົ່ງຫານ້ອງ Nok Mahavong ເບິ່ງເດີ້...ລາວໜ້າຈະຍັງເກັບໄວ້ຢູ່

"ການເຮັດທຸລະກິດ ຄວນເຮັດໃຫ້ມ່ວນ ແລະ ມີການຝຶກຄວາມສ້າງສັນ"-ປະຣາມາຈານໃນການສ້າງ ແລະ ຂະຫຍາຍທຸລະກິດໃນນາມ VIRGIN ກວ່າ 400 ບໍລິສັດທົ່ວໂລກ

ນອກຈາກນັ້ນ, ກໍຍັງມີອີກຫຼາຍຄຳຖາມເຊັ່ນວ່າ...ການສ້າງຄວາມເຊື່ອໝັ້ນໃຫ້ກັບລູກຄ້າໃນການເລີ່ມຕົ້ນເຮັດທຸລະກິດຄວນເຮັດແນວໃດ, ເງິນແມ່ນປັດໄຈຫຼັກຂອງຜູ້ບໍລິຫານອົງກອນທີ່ດີບໍ່? (ອັນນີ້ ຖືວ່າເປັນຄຳຖາມທີ່ Popular ເລີຍແລະ)

ຂະນະດຽວກັນ, ມັນກໍປາສະຈາກບໍ່ໄດ້ເຖິງຂໍ້ຂາດຕົກບົກຜ່ອງ...

ຊຶ່ງກໍເກີດການຂັດຂ້ອງທາງດ້ານເຕັກນິກແດ່ເລັກໜ້ອຍ...ເຮັດໃຫ້ວີດີໂອທີ່ Live ຢູ່ນັ້ນ...ປີ້ນລວງ

ຈຶ່ງເບິ່ງຍາກ...(ປວດຄໍ, ເຊື່ອແນ່ວ່າ...ທຸກຄົນບໍ່ຢາກຟັງແຕ່ສຽງ ແຕ່ຢາກເບິ່ງວີດີໂອໄປພ້ອມ)

ດັ່ງນັ້ນ, ຈຶ່ງເຮັດໃຫ້ເກີດມີ “ນັກການເງິນ Talk EP.1 (ຕອນທີ 2)” ຕາມມາ ໂດຍທາງເພກຈ໌ໄດ້ລຶບ ຕອນທີ 1 ອອກແລ້ວ, ມັນຈຶ່ງເປັນວີດີໂອທີ່ບໍ່ຕໍ່ເນື່ອງປານໃດ

ຢ່າງໃດກໍຕາມ, ຖ້າທຸກຄົນຕິດຕາມເພກຈ໌ “ນັກການເງິນ” ກໍຈະເຫັນວ່າ...

ຕອນແລງວັນສຸກທີ່ຜ່ານມາ ໄດ້ມີການ Live ແບບສົດໆເຊັ່ນກັນ ທີ່ “ນັກການເງິນ” ແຈ້ງກ່ອນໜ້ານີ້...ກ່ຽວກັບຫົວຂໍ້ “ເບຍລາວ ຫຼື ທ່ານ.ກິດສະໜາ ວົງໄຊ ຜູ້ສ້າງຕຳນານເບຍລາວ” ເຊິ່ງເປັນບໍລິສັດທີ່ເສຍພາສີໃຫ້ລັດຖະບານປະມານ 200 ລ້ານໂດລາ

ແຕ່ທ້າຍສຸດ, ເມື່ອ Live ນັ້ນຈົບລົງ ການອັບໂຫລດວີດີໂອ ກໍຫຼົ້ມ (ໜ້າເສຍດາຍ)

*ອັນທີ່ຮູ້ໄດ້ຂ້າງເທິງນັ້ນ ແມ່ນຂ້ອຍຊອກຫາວີດີໂອບໍ່ເຫັນ ເລີຍສົ່ງຖາມອ້າຍເອກ

ຍັງມີອີກສິ່ງໜຶ່ງທີ່ຂ້ອຍຈັບຈຸດໄດ້ຄື... “ຂ້ອຍເວົ້າຮອດໄສລະ?” (ເບິ່ງແລ້ວ ອົມຍິ້ມໄປພ້ອມ...)

ຄິດໃນໃຈວ່າ...ອ້າຍເອກຄືຖາມແນວນີ້ວ໋ະ...ຄືຊິແມ່ນລາວຕື່ນເຕັ້ນ...ຫຼື ລາວເປັນຄົນຂີ້ລືມບໍ່...

ເພາະວ່າ ຖ້າເຮົາຖາມແບບນີ້ ອາລົມຂອງຜູ້ທີ່ເບິ່ງຢ່າງຕັ້ງໃຈຈະຕົກ ແລະ ບໍ່ຕໍ່ເນື່ອງ

ເຊິ່ງອ້າຍເອກຄວນຈະຈັບຈຸດທີ່ໂຕເອງເວົ້າແລ້ວປະໄວ້ບ່ອນໃດໃຫ້ໄດ້..

ທ້າຍນີ້, ກໍບໍ່ມີຫຍັງຫຼາຍ...ວິເຄາະຕາມສະບັບ “ຍົກຍ້ອງ ແລ້ວຕິຊົມ”

ເຊິ່ງມັນມີຄວາມຜິດພາດກັນໄດ້...

ແຕ່ສິ່ງທີ່ຂ້ອຍດີໃຈຫຼາຍກວ່າຄື “ຍັງບໍ່ມີໃຜອອກມາ Live ຖາມ-ຕອບກ່ຽວກັບທຸລະກິດໃນລາວເຮົາ ແບບສົດໆຄືແນວນີ້ມາກ່ອນ” ຈຶ່ງຖືວ່າເປັນປະຖົມມະເລີກອັນດີໃຫ້ແກ່ຜູ້ທີ່ມີຄວາມສົນໃຈ, ເປັນປະກົດການທີ່ເກີດການກົດແຊຣ໌ ແລະ ບອກຕໍ່ຂອງກຸ່ມຄົນທີ່ຕິດຕາມເພກຈ໌ “ນັກການເງິນ”; ເຊິ່ງຂ້ອຍຄິດວ່າ ເປັນສິ່ງທີ່ໜ້າຈັບຕາ ແລະ ໜ້າຕິດຕາມພໍສົມຄວນໃນ Live ຕໍ່ໆໄປ.

ຂຽນໂດຍ: ວິລັດຕະກອນ ພະທິດມີໄຊ

ປລ. ທຸກຄົນສາມາດເບິ່ງວີດີໂອ Live ໄດ້ໃນເພກຈ໌

ນັກການເງິນ Talk EP1.