ຫຼັກການ 6 P ງ່າຍໆ ເພື່ອປະສົບຜົນສໍາເລັດການເຮັດວຽກ ມາເບິ່ງກັນເລີຍວ່າມີຫຍັງແນ່.

• Polite: 

          ສຸພາບອ່ອນນ້ອມ, ຄົນທີ່ຫຍິ່ງ ບໍ່ຮູ້ຈັກກາລະເທສະ ຍຶດຖືຕົນເອງເປັນຫຼັກຈະບໍ່ມີໃຜທີ່ຢາກຈະຄົບຫານໍາ. ການເປັນຄົນສຸພາບອ່ອນນ້ອມ ຈະເຮັດໃຫ້ມີແຕ່ຄົນຮັກແພງ ແລະ ຢາກຊ່ວຍເຫຼືອ ເຊິ່ງຖ້າເຮົາມີຕໍາແໜ່ງທີ່ສູງຢູ່ແລ້ວ ຍິ່ງຕ້ອງເປັນຄົນມີຄວາມສຸພາບອ່ອນນ້ອມ ເພາະຈະເຮັດໃຫ້ຜູ້ອື່ນເກງໃຈເຮົາຫຼາຍຂຶ້ນ ກົງກັນຂ້າມການເຮັດໂຕແຂງກະດ້າງ, ຫຍິ່ງ ຈະເປັນທີ່ລັງກຽດຂອງສັງຄົມ ແລະ ບໍ່ມີໃຜຢາກຄົບຫາຢ່າງແນ່ນອນ

• Patient

          ມີຄວາມມານະອົດທົນຕໍ່ບັນຫາ ເພາະການເຮັດວຽກຕ້ອງພົບກັບອຸປະສັກສະເໝີ ການຄວາມອົດທົນ ແມ່ນສອດຄ່ອງກັບການເຮັດຕົວໃຫ້ສະຫງົບ ເພາະການທີ່ເຮົາມີຈິດໃຈທີ່ສະຫງົບໄດ້ ເຮົາຕ້ອງຮູ້ຈັກອົດກັ້ນ ລະງັບອາລົມຄວາມຮູ້ສຶກທີ່ບໍ່ດີຕ່າງໆຖ້າຫາກສິ່ງໃດບໍ່ເປັນໄປຕາມທີ່ເຮົາຄາດຫວັງໄວ້ ເຮົາຕ້ອງອົດທົນຖ້າໃຫ້ເຖິງຊ່ວງເວລາຂອງເຮົາ ນອກຈາກນີ້ຍັງຕ້ອງອົດທົນຕໍ່ບັນຫາ ແລະ ຄວາມຍາກລໍາບາກໃນການເຮັດວຽກອີກດ້ວຍ.

• Peaceful

          ພະຍາຍາມໃຊ້ຄວາມສະຫງົບເພື່ອແກ້ໄຂບັນຫາຕ່າງໆທີ່ເຂົ້າມາ. ການມີຈິດໃຈທີ່ສະຫງົບ ດັ່ງຄໍາເວົ້າທີ່ວ່າ: ຈົ່ງໃຊ້ຄວາມສະຫງົບເພື່ອສະຍົບຄວາມເຄື່ອນໄຫວ ເປັນຄໍາເວົ້າທີ່ໃຊ້ໄດ້ຜົນຫຼາຍ ເວລາເກີດບັນຫາຂຶ້ນ ເຮົາຢ່າຟ້າວຕົກໃຈໄປກັບບັນຫານັ້ນ ການທີ່ເຮົາມີຈິດໃຈທີ່ສະຫງົບ, ມີສະມາທິ ຈະເຮັດໃຫ້ເຮົາມີວິທີໃນການຄິດຫາວິທີແກ້ໄຂ ນອກຈາກນີ້ຍັງເຮັດໃຫ້ເຮົາມີສຸຂະພາບຈິດທີ່ດີອີກດ້ວຍ.

• Positive

          ເບິ່ງໂລກໃນແງ່ດີບໍ່ອັກຄະຕິກັບວຽກທີ່ເຮັດ ຄວນເບິ່ງຫາການພັດທະນາຕົນເອງ ການມີທັດສະນະຄະຕິທີ່ເປັນບວກ ເບິ່ງໂລກໃນແງ່ດີຢູ່ສະເໝີ ບໍ່ຄິດໃນທາງລົບເຊັ່ນ ຖ້າຫາກພົບບັນຫາໃນການເຮັດວຽກ ແທນທີ່ຈະມານັ່ງກຸ້ມໃຈຄິດວ່າເທື່ອນີ້ຕ້ອງບໍ່ດີແນ່ນອນ ຢາກໃຫ້ເບິ່ງວ່ານີ້ເປັນຫົນທາງໜຶ່ງທີ່ຈະຝຶກຝົນໃຫ້ເຮົາເກັ່ງ ແລະ ກ້າຫຼາຍຂຶ້ນ.

• Punctual

          ຄວນເປັນຄົນທີ່ຕົງຕໍ່ເວລາຈະໄດ້ຮັບຄວາມໄວ້ວາງໃຈ ແລະ ໜ້າເຊື່ອຖື. ການເປັນຄົນທີ່ຕົງຕໍ່ເວລາ ມະນຸດເຮົາໄດ້ປູກຝັງໃຫ້ເປັນຄົນທີ່ມີວິໄນ ຮູ້ຈັກຕົງຕໍ່ເວລາມາຕັ້ງແຕ່ຍັງເປັນເດັກນ້ອຍ ເຊັ່ນ ການບໍ່ໄປໂຮງຮຽນຊ້າ ການສົ່ງວຽກບ້ານຕາມກໍານົດ ໃນການເຮັດວຽກກໍເຊັ່ນດຽວກັນ ຖ້າຫາກເຮົາມາເຮັດວຽກຊ້າ ຫົວໜ້າກໍຄົງບໍ່ມັກ ເພາະຂະໜາດເວລາຍັງບໍ່ສາມາດຮັກສາໄດ້ ແລ້ວເຈົ້າຈະໄດ້ຮັບຄວາມໄວ້ວາງໃຈໃຫ້ເຮັດວຽກໄດ້ແນວໃດ

• Professional

          ເປັນມືອາຊີບໃນການເຮັດວຽກຢ່າງດຸໝັ່ນຂະຫຍັນພຽນເຮັດໂຕໃຫ້ມີຄວາມຮູ້ສະເໝີ. ຄວາມເປັນມືອາຊີບໃນການເຮັດວຽກ ການທີ່ເຮົາມີໜ້າທີ່ຫຍັງ ເຮົາຄວນເຮັດຕົວໃຫ້ມີຄວາມຮູ້ ຄວາມຊ່ຽວຊານໃນໜ້າທີ່ນັ້ນໆ, ໝັ່ນສະແຫວງຫາຄວາມຮູ້ໃໝ່ໆ ແລະ ໝັ່ນຝຶກຝືມືໃນການເຮັດວຽກຢູ່ສະເໝີ ເພື່ອໃຫ້ວຽກຂອງເຮົາອອກມາດີທີ່ສຸດ ການເຮັດວຽກຢ່າງມືອາຊີບ ຈະເປັນທີ່ຊື່ນຊົມ ແລະ ໄວ້ວາງໃຈໃຫ້ເຮົາເຮັດວຽກ ດູແລວຽກຂອງເຂົາຕໍ່ໄປ.

ທີ່ມາ: Jobsdb.com