ທ່ານ ນາງ ວາລີ ເວດສະພົງ ຮອງປະທານ ສຄອຊ ໃນມຸມມອງພາກທຸລະກິດ ປີ 2019

timer

remove_red_eye 350 views


cvConnect.la - ທ່ານ ນາງ ວາລີ ເວດສະພົງ ຮອງປະທານ ສຄອຊ  ໃນມຸມມອງພາກທຸລະກິດ ປີ 2019

          ປີ 2018 ການດໍາເນີນທຸລະກິດຂອງຜູ້ປະກອບການຂະແໜງການຕ່າງໆ ຖືວ່າຍັງມີຄວາມທ້າທາຍບໍ່ໜ້ອຍ ເນື່ອງຈາກໄດ້ຮັບຜົນກະທົບຈາກເສດຖະກິດໂລກ, ໄພທໍາມະຊາດພາຍໃນ ເຖິງວ່າລັດຖະບານຈະມີຫຼາຍມາດຕະການຕ່າງໆອອກມາເພື່ອກະຕຸ້ນເສດຖະກິດ ແຕ່ຂອດຈັດຕັ້ງປະຕິບັດຍັງບໍ່ທັນເອກະພາບ, ສ່ວນທ່າອ່ຽງການດໍາເນີນທຸລະກິດ ໃນປີ 2019 ຜູ້ປະກອບການມີຄວາມຫວັງຈະດີຂຶ້ນ ຖ້າຫາກບັນດາມາດຕະການຂອງພາກລັດຖືກຈັດຕັ້ງປະຕິບັດເປັນເອກະພາບກັນໃນລວງດຽວ.

 

          ທ່ານ ນາງ ວາລີ ເວດສະພົງ ຮອງປະທານ ສຄອຊ ໃຫ້ສຳພາດວ່າ: ເສດຖະກິດລາວ ໃນໄລຍະ 2 – 3 ປີຜ່ານມາ ມີການຂະຫຍາຍຕົວຊ້າລົງເຫັນໄດ້ຢ່າງຊັດເຈນ ສາເຫດມີທັງປັດໄຈພາຍໃນ ແລະ ພາຍນອກ, ປັດຈຸບັນ ນາຍົກລັດຖະມົນຕີ ໄດ້ອອກຄຳສັ່ງເລກທີ 02/ນຍ ຈໍາກັດສິ່ງກີດຂວາງຕໍ່ການລົງທຶນ ແລະ ດໍາລັດຕ່າງໆ ເພື່ອໃຫ້ແຕ່ລະກະຊວງນໍາໄປຈັດຕັ້ງປະຕິບັດ ເປົ້າໝາຍຄືບັນລຸຕົວຊີ້ວັດຕ່າງໆຄືຫຼຸດພົ້ນອອກຈາກປະເທດດ້ອຍພັດທະນາໄດ້ສຳເລັດ.

 

          ຄຳສັ່ງເລກທີ 02/ນຍ ທີ່ມີການຈັດຕັ້ງປະຕິບັດລະຫວ່າງ ເດືອນຕຸລາ 2018 ເປັນຕົ້ນມາ ເລີ່ມປາກົດໃຫ້ເຫັນເປັນຮູບປະທຳແດ່ແລ້ວເລັກໜ້ອຍ ກະຊວງທີ່ເຮັດໄດ້ພົ້ນເດັ່ນ ຄື: ກະຊວງອຸດສາຫະກຳ ແລະ ການຄ້າ, ກະຊວງແຜນການ ແລະ ການລົງທຶນ ເປັນຕົ້ນ, ສ່ວນກະຊວງອື່ນໆຄາດວ່າປີ 2019 ຈະເຫັນຜົນຢ່າງແນ່ນອນ.
ທ່ານກ່າວຕື່ມອີກວ່າ: ເສດຖະກິດລາວ ໃນປີ 2019 ຈະກະເຕື້ອງຂຶ້ນມາດີຂຶ້ນກວ່າເດີມ ໂດຍສະເພາະຂະແໜງບໍລິການ ແລະ ກະສິກຳ ແຕ່ລັດຖະບານຄວນຈະລົງທຶນໃສ່ຂະແໜງກະສິກຳຢ່າງມີຈຸດສຸມ, ນຳເອົາເຕັກນິກ, ວິຊາການ, ສົ່ງເສີມກະສິກຳພາຍໃນໃຫ້ມີຄວາມເຂັ້ມແຂງ, ສ້າງຄວາມເຊື່ອຖືໃຫ້ກັບຜູ້ບໍລິໂພກພາຍໃນໄດ້ດີຍິ່ງຂຶ້ນ. ທັງນີ້, ກໍຕ້ອງເຂັ້ມງວດສະກັດກັ້ນສິນຄ້ານຳເຂົ້າທີ່ຫຼົບຫຼີກພາສີອາກອນ.

 

          ນອກຈາກກະສິກຳແລ້ວ ອຸດສາຫະກຳຂະໜາດໃຫຍ່ໂຄງການທີ່ລັດຖະບານມີການເຊັນສັນຍາກ່ອນແລ້ວ ອັນນັ້ນຖືເປັນສິ່ງທີ່ແນ່ນອນທີ່ຈະເຮັດໃຫ້ເມັດເງິນໄຫຼເຂົ້າປະເທດ, ອີກຂະແໜງການທີ່ລັດຖະບານຄວນເອົາໃຈໃສ່ຄືຂະແໜງບໍລິການ ໂດຍສະເພາະປີ 2019 ປີທ່ອງທ່ຽວ ລາວ – ຈີນ ລັດຖະບານຈະຕ້ອງເພີ່ມນະໂຍບາຍສົ່ງເສີມເພື່ອໃຫ້ນັກທ່ອງທ່ຽວເຂົ້າມາ ສປປ ລາວ ຫຼາຍຂຶ້ນ, ໃນຂະນະດຽວກັນກໍຕ້ອງໄດ້ເຂັ້ມງວດວີຊາຄົນເຂົ້າ – ອອກເມືອງ, ລັດຖະບານ ແລະ ບໍລິສັດນຳທ່ຽວຕ້ອງໄດ້ປຶກສາຫາລືກັນ ເພາະຜ່ານມາຜູ້ນຳທ່ຽວ, ວິຊາການທີ່ເຂົ້າມາເຮັດວຽກໃນໂຄງການຕ່າງໆທີ່ຜ່ານວີຊາກໍຈັດເປັນປະເພດນັກທ່ອງທ່ຽວທັງໝົດ.

 

 

ຂໍ້ມູນຈາກ: ຂ່າວເສດຖະກິດການຄ້າ

Tags:

Share on your timeline:


ac_unit ຜູ້ສະໜັບສະໜູນ

ຝາກປະຫວັດເພີ່ມໂອກາດເຮັດວຽກ

ເພື່ອໃຫ້ທ່ານມີໂອກາດໄດ້ວຽກງານເພີ່ມຂຶ້ນ ຝາກປະຫວັດໄວ້ນຳພວກເຮົາ
ພຽງໃຊ້ເວລາ 5 ນາທີໃນການກອກປະຫວັດ

mode_edit ສ້າງປະຫວັດເລີຍ